ဒေါက်တာတင်လှိုင် (စာရေးဆရာ ဘိုးလှိုင်)
ပညာရေးလွတ်လပ်ခွင့်ဆိုတာက ဆရာက အဓိကပေါ့လေ။ ဆရာက သူ့ပေးထားတဲ့ သူသင်ဖို့တာဝန်ရှိတဲ့ ပညာရပ်ကို ဘယ်လိုသင်မလဲဆိုတာ သူ့စိတ်တိုင်းကျစီမံခွင့်လေးပေါ့။
သူ့အလုပ်ကိုသူ လွတ်လွတ်လပ်လပ် လုပ်ခွင့်ကလေး၊ အဲဒီဟာကိုအာမခံပေးဖို့၊ ဆရာ ဆရာမရဲ့ ကိုယ်ပိုင် လွတ်လပ်ခွင့်ပေါ့၊ သူ ကြောင့်ကြ သောက ကင်းရမယ်၊ သူဟာ ကြောက်ရွံ့မနေရဘူး၊ သူ့မှာ ရွေးချယ်ခွင့်တွေရှိရမယ်၊ အဓိကက အုပ်ချုပ်ရေးဆိုတဲ့ဟာက ဆရာ ဆရာမအပေါ် မဖိစီးရဘူး၊ အခုဟာက အုပ်ချုပ်ရေးအပိုင်းက အထက်နဲ့အောက်ဆိုတော့ အင်မတန်ကို နိုင့်ထက်စီးနင်း နိုင်တယ်၊ မြို့နယ်မှာ လုပ်နေတဲ့ ဆရာမကို မြို့နယ်ပညာရေးမှူးက မကြိုက်လို့ မြို့နယ်အစွန်အဖျားကို သူပို့မယ်၊ သူကပြောင်းနိုင်တာကိုး။ သူ့ကို ကြောက်နေရတယ်။ ရာထူးတိုးတာလည်း သူတို့လက်ထဲ၊ ပြောင်းတာ ရွေ့တာလည်း သူတို့လက်ထဲ ဆိုတော့ လွတ်လပ်ခွင့်မရှိဘူး။ တကယ်ဆိုရင် ကျောင်းတစ်ကျောင်းရဲ့ လုပ်ပိုင်ခွင့်က အဲဒီကျောင်းဝန်း အတွင်းမှာပဲ ဖြစ်သင့်တာပေါ့။ သူတို့ကိုတော့ လုံးလုံးဘေးချိတ်ထားတာတော့ မဖြစ်ရဘူးပေါ့၊ ဒါပေမယ့် လုပ်ပိုင်ခွင့်တွေက အောက်မှာပုံထားရမယ်၊ အပေါ်ကလူက သူတို့ကို ကူညီတာပဲ ဖြစ်ရမယ် အခုဟာက အဲဒီလို မဟုတ်ဘူး ဖြစ်နေတယ်။
---------------------------------------------------------------------------------------------------------------
ဒေါက်တာဓမ္မပီယ (ငါးကျမ်းပြန် ကျောင်းတိုက်)
ဘုန်းတော်ကြီးသင် ပညာရေးကျောင်းတွေကို နိုင်ငံတော် အထိန်းအကွပ်အောက်မှာ မထားရှိဘဲနဲ့ လွတ်လပ်စွာ အထက်တန်းကျောင်းတွေ၊ အလယ်တန်းကျောင်းတွေ ဖွင့်ခွင့် တောင်းဖို့ရယ်၊ နောက်တစ်ခုက ဘုန်းတော်ကြီးသင် ပညာရေးကျောင်းတွေကို အနှောင်အဖွဲ့ ကင်းပြီးတော့ ကိုယ့်ဖာသာကိုယ် လွတ်လွတ်လပ်လပ် လုပ်နိုင်ဖို့ရယ်၊ နောက်တစ်ခုက နိုင်ငံအတွင်းမှာ မွေးဖွားတဲ့ လူအားလုံးကို အခမဲ့ ပညာရေးနဲ့ မသင်မနေရ ပညာရေးမျိုးကို တောင်းချင်တာပေါ့။ နောက်တစ်ခုကဘုန်းဘုန်းတို့ ဘယ်တုန်းကမှ လုပ်မပေးဘူးတဲ့ ဥပမာ ထိုင်းနိုင်ငံမှာ ဆိုရင် အကြီးတန်းအောင်ရင် အထက်တန်းကျောင်းနဲ့ ညီဲတဲ့ အသိအမှတ်ပြုတာမျိုး၊ ဓမ္မာစရိယဆိုရင် ဘီအေနဲ့အညီင်္ ထားပေးတယ်။ အိန္ဒိယ တက္ကသိုလ်တွေ၊ သီဟို တက္ကသိုလ်တွေလည်း ဒီအတိုင်း ထားပေးတယ်။ ဘုန်းဘုန်းတို့က ကိုယ့်ပြည်မှာ ဖြစ်ပေမယ့် ဓမ္မာစရိယဆိုရင် ဘီအေနဲ့အညီ ထားမပေးတာ၊ တက္ကသိုလ်ဝင်ခွင့်တွေကို ၀င်ရောက်ဖြေဆိုခွင့်မရှိတော့တာ၊ အကြီးတန်းအောင်ရင် အထက်တန်းကျောင်းနဲ့အညီ ထားမပေးတာ၊ တက္ကသိုလ်ဝင်ခွင့်တွေကို ၀င်ရောက်ဖြေဆိုခွင့်မရှိတော့အဲဒါတွေကို နိုင်ငံတော်က သိအောင် ဒီလို ကျယ်ကျယ်ပြန့်ပြန့် လုပ်တဲ့ ဆွေးနွေးပွဲတွေမှာ ပါဝင်ဆွေးနွေးတာဖြစ်ပါတယ်။
-------------------------------------------------------------------------------------------------------------
ဒေါက်တာသိန်းလွင်( Thinking Classroom Foundation)
ကျွန်တော့် ရည်မှန်းချက်ကတော့ မြန်မာနိုင်ငံပညာရေးကို မြှင့်တင်ချင်တယ်၊ အဲဒီလို မြှင့်တင်တဲ့နေရာမှာ အားလုံးပါဝင်တဲ့ ပညာရေး မြှင့်တင်မှုမျိုး ဖြစ်စေချင်တယ်။ တစ်ယောက်တည်း တစ်ဖွဲ့တည်း အစိုးရတစ်ဖွဲ့တည်း လုပ်နေတာမျိုး မဖြစ်သင့်ဘူးဆိုတော့ ပညာရေးလုပ်တဲ့သူ အားလုံး၊ ဆရာတွေရော၊ မိဘတွေရော၊ ပညာရေးလေ့လာသူတွေရော၊ အားလုံးပါဝင်တဲ့ ပြုပြင်ပြောင်းလဲမှုမျိုး ဖြစ်စေချင်တယ်။ ပညာရေး ပြုပြင်ပြောင်းလဲမှုမှာ ပြည်သူ့လွှတ်တော်ကနေပြီးတော့ ကျယ်ကျယ်ပြန့်ပြန့် ဆောင်ရွက်ဖို့ ပြည်သူ့လွှတ်တော် အနေနဲ့ ပညာရေး ပြုပြင်ပြောင်းလဲမှုကော်မတီတစ်ရပ်ဖွဲ့စေချင်ပါတယ်။ အဲဒီ ကော်မတီကနေ ပညာရေးပြုပြင်ပြောင်းလဲမှု ဖြစ်စေချင်ပါတယ်။
----------------------------------------------------------------------------------------------------------------
စာရေးဆရာကိုတာ
ပညာရေးစနစ်ကြီး ပြောင်းလဲပစ်ချင်တယ်ဆိုရင် စိတ်ကူးစိတ်သန်းတွေ လိုမယ်လို့ ကျွန်တော်ထင်ပါတယ်။ လက်ရှိပညာရေးဌာနက လူကြီးတွေနဲ့တော့ မဖြစ်ဘူးလို့ထင်တာပါပဲ။ သူတို့က တော်ချင်တော်မှာပါ၊ သူတို့မှာ အဲဒီစိတ်ကူးစိတ်သန်းရှိတယ် မရှိဘူး ပြောလို့မရဘူးလို့ ထင်ပါတယ်၊ ဘာဖြစ်လို့လဲဆိုတော့ နှစ်ပေါင်းများစွာ ခေါက်ရိုးကျိုးလာခဲ့တဲ့ အခြေအနေတွေနဲ့ နေလာခဲ့ကြလို့ပါပဲ။ အဲဒီတော့ ခင်ဗျားကရော စိတ်ကူးစိတ်သန်း ရှိလားလို့ မေးရင် ကျွန်တော့်မှာ ရှိတော့ရှိပါတယ်။ ကျွန်တော်များ သမ္မတဖြစ်ရင်၊ ကျွန်တော်များ ပညာရေးဝန်ကြီးဖြစ်ရင် ဘာများလုပ်မလဲဆိုပြီး စိတ်ကူးကြည့်ပါတယ်။ ပထမဆုံး ဘတ်ဂျက်တွေကို ၂ဆ ၃ဆ တိုးမှ ဖြစ်မှာပဲ၊ အဲင်္ဒီလို စဉ်းစားမှာပေါ့၊ နောက်တစ်ခုကတော့ ဘုန်းတော်ကြီးသင်ကျောင်းတွေကိုလည်း ဖွင့်ခွင့်ပေးလိုက်မယ် ဘာဖြစ်လို့လဲဆိုတော့ ငါ့မှာ ၀န်ထုပ်ဝန်ပိုးတွေက ကြီးတာကိုး၊ ကျောင်းတွေကလည်းဆောက်ရဦးမယ်၊ ဆရာတွေကလည်းခန့်ရဦးမယ်၊ ငါ့မှာရှိတဲ့ Resources တွေနဲ့ ၊ ငါ့မှာ ရှိတဲ့ လေ့ကျင့် သင်ကြားထားတဲ့ ဆရာတွေရဲ့ အရည်အချင်းနဲ့ ဘယ်လိုမှ မဖြစ်နိုင်ဘူး။ အဲဒီတော့ ငါကျန်တဲ့သူတွေကို လွှဲပေးမှပဲ၊ ပြီးရင် လင်းတလောက်တော့ ငှက်တိုင်းလှမှာပဲ၊ ငါ့လောက်တော့ သူတို့လည်း စေတနာရှိကြမှာပဲ စိုးရိမ်နေလို့ မဖြစ်ပါဘူး။ ကျွန်တော်ဆို အဲဒီအတိုင်းတွေးမှာပဲ။
-------------------------------------------------------------------------------------------------------------
ဒေါက်တာဒေါ်မြင့်မြင့်ခင်
ပညာရေးကို ပြောင်းမယ်ဆိုရင်တော့ အမြစ်ကလှန်ုပြီး ပြောင်းမှရမယ်။ ဟိုနေရာဖြုတ် ဒီနေရာပြောင်းလုပ်လို့ မရဘူး။
--------------------------------------------------------------------------------------------------------------
သန့်စင်အောင်(ရန်ကင်း) ( အညတြ စာရေးဆရာ)
ဗဟိုက ချုပ်ကိုင်ထားတဲ့ စနစ်နဲ့ လုပ်နေလို့ကတော့ ကောင်းစရာအကြောင်း သိပ်မရှိသေးပါဘူး၊ တိုင်းနဲ့ပြည်နယ် အလိုက် အစိုးရတွေ ရှိနေဘီပဲ။ အောက်ခြေကို လုပ်ပိုင်ခွင့် အပြည့်အ၀ပေးဖို့ လိုအပ်ပါတယ်။ နောက်တဆင့် မြို့နယ်ပိုင်းက ကြီးကြပ်ပေးဖို့ပဲ တာဝန်ယူပြီး ကိုယ့်ကျောင်း ကိုယ်ဒေသအလိုက် လုပ်ပိုင်ခွင့်ရဘီဆို အပြိုင်အဆိုင်ကြီုးစားကြရင်းနဲ့ ပညာရေးဟာ ပြန်လည် ဦးမော့လာနိုင်ပါတယ်။
No comments:
Post a Comment